На соботу почню театрални роботнї „Театер на дланї”
12. мая 2025.
Означени 30 роки суфлерского „стажу” Танї Арва Планчак
23. мая 2025.
Як було и наявйоване, соботу, 17. мая, у просторийох Дома култури Руски Керестур и нашого националного театра отримана перша зоз циклусу театралних роботньох под назву „ТЕАТЕР НА ДЛАНЇ“, хтори орґанизує Руски народни театер „Петро Ризнич Дядя“ з намиру би ше стимуловало континуовану роботу у театралней уметносци и же би ше подзвигнул єй квалитет. На першей роботнї под назву “Основи сценскей бешеди и артикулация гласох на сцени“ позберало ше импресивне число заинтересованих дзецох хтори през рижни файти вежбох хтори едукаторе прилагодзели тому возросту звладовали перши крочаї у тей файти уметносци. Спрам перших упечаткох шицких присутних (и нащивительох и едукаторох, та и самих орґанизаторох), тота перша роботня прешла барз успишно, а уж на нєдзелю 25. мая од 16 по 18 годин будзе отримана друга, под назву: „Основи сценскей експресиї-виражованє емоцийох на сцени“. На тих роботньох обезпечени едукаторе, технїчна лоґистика, нєобходни материял за роботу, як и полудзенок и ошвиженє за шицких учашнїкох.
Тот проєкт финансийно помогли Буджетски фонд за национални меншини односно Министерство за людски и меншински права и дружтвени диялоґ и Национални совит рускей националней меншини, а орґанизаторе обчекую помоц и од Министерства култури републики Сербиї и Покраїнского секретарияту за културу, явне информованє и одношеня з вирскима заєднїцами.
