Вечар ювилантох пошвецени Дудашови, Макайови и Павловичови
29. марта 2025.
Явна поволанка за директора РНТ „Петро Ризнич Дядя”
1. мая 2025.
У рамикох тогорочного 57. Драмского мемориялу Петра Ризнича Дядї, одбавена представа за одроснутих, „Полицаєˮ, у Културним центре у Кули. З представу, робену по тексту Славомира Мрожека, у режиї Янка Лендєра зоз Вербасу, наступел РНТ „Петро Ризнич Дядя”.
На кулскей сцени вчера, 30. марца наступели: Ребека Планчак, Яким Винаї, Емил Няради, Нада Ленєр, Михайло Бодянец, Андрея Штефанко и Сара Ковач.
Слово о драми хтора на комични и апсурдни способ приказує цо би ше случело зоз полицию у дружтве у хторим народ послухни и дзе нєт процивеня держави, дзе полицийни службенїки нє маю кого загарештовац. Же би ше оправдало важносц постояня полициї, єй шеф одлучує на рижни лукави способи, през спреводзку, створиц державного нєприятеля.
Текст представи преложела Наташа Ґрунчич, Асистенти режиї були Славко Орос и Владимир Надь Ачим, суфлер и реквизитер Таня Арва Планчак, костимоґраф Таня Орос, Майстор тона Владимир Бесерминї, майстор шветла Желько Пашо, маски виробел Цвиєтин Аничич, а подобово ришеня обезпечела Александра Медєши.
Тексти за сонґи писал Славко Орос, музику Марина Роман и Кристина Афич, аранжмани за нїх поробел Златко Русковски, шпивали Марина Роман и Кристина Афич, провадзаци гласи були Марина Роман, Кристина Афич и Дорика Емейди. Назви сонґох „Уж не будзе полициїˮ, „Державу зме пошорелиˮ и „Будучносц нас чека краснаˮ.
У децембру, прешлого року, представа „Полицаєˮ була премиєрно виведзена у Руским Керестуре, медзитим лєм камерно, та на тот завод, гварене же ше представу планує приказац и на велькей сцени пред керестурску публику, накадзи ше за тим укаже нагода.
