У Руским културним центру отримана 21. „Веселинка”
20. июня 2022.
Ушорює ше фундус Театра
23. сентября 2022.На бини велькей сали Дома култури у Руским Керестуре тирваю интензивни мизансценски проби нового проєкта у Руским народним театру «Петро Ризнич Дядя» под назву «Метаморфози». Слово о адаптациї вецей крадких драмских сличкох познатого сербского писателя Милоша Николича чийо два драми на сцену поставел и наш театер («Ковалє» и «Случай нєвиней ґдовици»), як и велї други у нашей жеми и иножемстве. З тей нагоди, зоз согласносцу автора, зробена значна адаптация текстох, зоз хторих дзепоєдни прешпивани до стихох, з намиру же би були виводзени як сонґи на сцени у представи хтора будзе виводзена у форми кабареа, односно мюзикла. Стихи за сонґи написали Ирина Гарди Ковачевич, хтора и преложела текст зоз сербского язика и Славко Орос, хтори поробел и и шицки други адаптациї, нарис сценоґрафиї, костимох, вибор музики и хтори режисер тей представи.
Музику за сонґи компоновал наш познати кантавтор Владимир Малацко. Робота на тим проєкту тирва уж скоро три мешаци и план же премиєра була виведзена у другей половки новембра. До проєкту хтори потримали Покраїнски секретарият за културу, Покраїнски секретарият за образованє и национални заєднїци, Национални совит Руснацох и даскелї спонзоре з Руского Керестура уключени вецей як трицец особи, насампредз вельки ґлумецки и технїчни ансамбл нашого Театра у хторим нови млади креативни моци хтори ше прешлого року позберали коло проєкта «Ениґма Дядя», з тей нагоди помоцнєни зоз представнїками штреднєй и старшей ґенерациї хтори уж децениями ноша репертоар нашого Театра. Основна намира у тей сезони же би ше патрачом, после двох драмох хтори виведзени прешлого року, понукло змист хтори их розтерхує од каждодньовосци, хтори их нашмеє и понукнє на роздумованє и хтори будзе реперторне ошвиженє яке уж длуго нє видзене на нашей сцени.
